Xalqimizning jahonning rivojlangan davlatlari qatoridan joy olishida milliy madaniyatimiz, ma’rifatimiz va ma’naviyatimizning o’rni beqiyosdir. Bugungi axborot texnologiyalari asrida intellektual salohiyatni yuksaltirishda, xususan, muhandislik kompyuter grafikasi sohasini rivojlantirish davr talabiga aylanib bormoqda.

Zamonaviy o‘qituvchining axborot texnologiyalarini chuqur egallashi hamda sohaning jadal rivojlanishi natijasida, Tasviriy san’at va muhandislik grafikasi ta’lim yo‘nalishi o‘quv rejasiga Muhandislik kompyuter grafikasi' fani joriy etildi.

Ushbu mustaqil ta’lim kursi «Muhandislik va kompyuter grafikasi» fanini chuqur o‘zlashtirish hamda AutoCAD dasturida ishlash ko‘nikmalarini shakllantirishga xizmat qiladi. Mazkur mustaqil ta’lim kursi o‘quv dasturi talablari asosida tayyorlangan bo‘lib, chizma geometriya va chizmachilik asoslaridan boshlang‘ich tushunchaga ega hamda kompyuterda ishlashni biladigan barcha texnika oliy o‘quv yurtlari talabalari, shuningdek, maktab, litsey va kollej o‘quvchilari uchun mo‘ljallangan. Hozirgi kunda AutoCAD dasturiy ta’minoti shaxsiy kompyuterlar uchun eng keng tarqalgan avtomatlashtirilgan loyihalash tizimi (SAPR) hisoblanadi.

Mazkur mustaqil ta’lim kursi talabadan yuqori darajadagi e’tiborni talab etadi. Kurs dasturi nafaqat kompyuter grafikasi mashg‘ulotlarini, balki 2D modellashtirish bo‘yicha nazariy bilimlarni mustahkamlovchi testlar hamda amaliy topshiriqlarni grafik dasturlarda bajarish yuzasidan metodik ko‘rsatmalarni ham qamrab olgan.

Talaba har bir mashg‘ulot yakunida o‘z bilimini tekshirish uchun tegishli variantni tanlab, videodarslik asosida topshiriqni mustaqil bajarishi lozim. Agar grafik ish oxiriga yetkazilmasa, videolavhani qayta ko‘rib, amallar ketma-ketligini takroran o‘rganish imkoniyati mavjud. Mashg‘ulotni to‘la o‘zlashtirmasdan turib, keyingi bosqichga o‘tish tavsiya etilmaydi.